Dar es Salaam. Leo dunia inaadhimisha siku ya baba, siku hii huadhimishwa kila Jumapili ya tatu ya Juni. Siku hii inaweza isiwe na kelele nyingi kama inavyokuwa kwenye siku ya mama kutokana na umaarufu wake.
Siku ya baba ni siku maalumu inayotolewa kwa ajili ya kuwaenzi na kuwashukuru baba kwa mchango wao mkubwa katika familia na jamii kwa ujumla.
Inawezekana hadi sasa unawaza ni namna gani unaweza kusherehea siku hii, kupitia makala haya nakukumbusha kwamba leo ni kuonyesha upendo, heshima, na shukrani kwa baba, walezi wa kiume, au mtu yeyote aliyechukua nafasi ya baba katika maisha yetu.
Mtu anaweza kuadhimisha siku hii kwa kumtunza na kumjali baba kwa njia ya vitendo. Hii inaweza kuwa kwa kumpikia chakula anachopenda.
Unaweza pia kumpeleka matembezi ya pamoja, au hata kumfanyia kazi ndogo ndogo za nyumbani kama ishara ya upendo. Matendo kama haya humfanya baba ajisikie kuthaminiwa na kupendwa na familia yake.
Kama ilivyo kwa mama hata baba anaweza kupewa zawadi. Zawadi ni njia nzuri ya kuonyesha upendo na shukrani, hii si lazima iwe ya gharama kubwa; inaweza kuwa barua ya kumshukuru, picha ya kumbukumbu, shati, au hata kadi yenye ujumbe wa upendo.
Jambo la muhimu zaidi si thamani ya zawadi, bali ni hisia na nia iliyomo ndani yake.
Vilevile, familia inaweza kukutana, watoto wanaweza kutumia nafasi hii kumuelezea baba wao jinsi walivyoguswa na mchango wake maishani mwao. Maneno ya moyo huweza kumtia faraja baba na kumfanya atambue thamani ya nafasi yake katika familia.
Aidha, njia nyingine nzuri ya kuadhimisha siku hii ni kutumia mitandao ya kijamii kwa kushiriki picha na maneno ya shukrani kwa baba. Hili linaweza kuwa njia ya kumletea furaha na pia kuwatia moyo baba wengine kuendelea kuwa mfano bora kwa familia zao.
Kwa upande mwingine, kwa wale ambao baba zao hawapo tena, siku hii inaweza kutumiwa kwa kuwakumbuka na kuwaombea.
Kutembelea kaburi lake, kutoa sadaka kwa jina lake, au hata kuandika shairi la kumkumbuka, ni njia za heshima na upendo wa kudumu.
Ni muhimu kutambua kuwa siku ya kipekee yenye maana kubwa kwa kila mmoja wetu. Tunapaswa kuitumia kwa hekima ili kuonyesha upendo wetu kwa wale waliotulea kwa juhudi na kujitolea.
Kwa njia yoyote ile tunayochagua, jambo la msingi ni kuhakikisha tunamfanya baba ajisikie wa pekee na mwenye thamani.
