Pemba. Rais wa Zanzibar, Dk Hussein Mwinyi amesema dhamira ya Serikali ni kuibadilisha Pemba kutoka nchi ya ahadi kubwa hadi kuwa mwanga mahiri wa uvumbuzi, biashara na maendeleo jumuishi.
Dk Mwinyi ametoa kauli hiyo leo Jumatatu Juni 16, 2025, wakati akifungua kongamano la uwekezaji Zanzibar lililofanyika kwa mara ya kwanza katika maeneo huru ya uwekezaji Micheweni Mkoa wa Kaskazini Pemba.
Dk Mwinyi amesema Serikali imelenga kuwavutia wawekezaji wa ndani na nje wenye mtazamo wa muda mrefu, ili kuleta maendeleo shirikishi, ajira kwa vijana na kuongeza pato la wananchi wa Pemba kwa uwekezaji wenye tija na endelevu.
Kufikia huko amesema wanazingatia mpango wa maendeleo wa Zanzibar, vipaumbele vya kimkakati vinavyojumuisha sekta ya kilimo, uvuvi endelevu, utalii wa mazingira, nishati jadidifu na maendeleo ya miundombinu.
“Tumedhamiria kuweka mazingira wezeshi ambapo uwekezaji sio tu kuwa na faida bali pia unaleta athari, ukileta manufaa ya kudumu kwa watu wetu huku tukilinda uzuri wa asili unaoifanya Pemba kuwa ya kipekee,” amesema kiongozi huyo.
Ameipongeza Mamlaka ya Uwekezaji Zanzibar (Zipa) akitaja sababu kuwa katika miaka ya hivi karibuni, wameweka msingi imara kupitia mageuzi ambayo yanaiweka Zanzibar kuwa kivutio cha kuvutia kwa uwekezaji.
Rais Mwinyi amesema misingi hiyo ni pamoja na kurahisisha taratibu za kiutawala, kuanzisha motisha zinazolengwa za fedha na zisizo za kifedha, na kuimarisha mifumo ya kisheria na kitaasisi ili kulinda maslahi ya wawekezaji.
Kwa kuzingatia kasi hiyo, Dk Mwinyi amesema mpango mkakati wa kukuza vitega uchumi Zanzibar 2024 hadi 2029, unaonyesha namna walivyodhamiria kuvutia vitega uchumi vinavyotokana na athari, hususani katika mikoa yenye maendeleo duni kama Pemba.
Katika kuhamaisha uwekezaji katika kisiwa hicho, kimetengewa kiwango cha chini cha uwekezaji wa dola 5 milioni (Sh12.9 bilioni) na wawekezaji wa kigeni au wa Kitanzania.
“Au tunataka uwekezaji wa Dola2 milioni za Marekani (Sh5.15 bilioni) unaozalisha ajira zisizopungua 100 za moja kwa moja kwa Watanzania katika sekta nyingine mbali na hoteli pamoja na uwekezaji katika visiwa vidogovidogo, kama inavyotambulika kwa mujibu wa masharti husika ya Sheria namba 10 ya mwaka 2023 Na. 10 ya mwaka 2023,” amesema.
Kwa mujibu wa kiongozi huyo, motisha hizi zimekusudiwa sio tu kuvutia mitaji, bali kuhakikisha uwekezaji kisiwani Pemba unakuwa jumuishi, unaoendana na malengo ya maendeleo.
“Na muhimu zaidi, kwa watu wa Pemba, huu ni wakati wenu. Ni wakati wa kuona kisiwa chako kikisitawi kupitia uwekezaji unaowajibika, uwekezaji unaoinua jamii, kuhifadhi utambulisho wetu wa kitamaduni, na kulinda hazina asilia zinazoifanya Pemba kuwa ya kipekee,” amesema
Amesema Zanzibar inatoa lango la soko linalokua la watumiaji zaidi ya milioni 400, likisaidiwa na vifaa vya kutegemewa, vifaa vya kisasa vya bandari, na mazingira thabiti ya sera.
Meneja masoko wa Shirika la Bima la Zanzibar (ZIC), Mohammad Said Matumula amesema wawekezaji wanaangalia eneo lenye bima kwa ajili ya kulinda mitaji yao.
Hivyo, amesema tayari shirika hilo limeshatanua wigo wa bima zake zikiwamo za hoteli na nyumba na zile za jumla.
Amesema huduma zinazotolewa itakuwa ni faraja kwa wawekezaji, kwa sababu bila kinga inaweza kuleta athari katika uwekezaji na watu kupoteza mali zao.
“Sisi katika eneo hili ni muhimu sana kwa sababu mwekezaji anaweza kutoa pesa zake nyingi, lakini bila kinga, ikatokea janga, itabidi aanze sifuri kwa sababu hatakuwa na kinga,” amesema Matumla.
Waziri wa Nchi, Ofisi ya Rais, Kazi Uchumi na Uwekezaji, Shariff Ali Shariff amesema kwa miaka, Pemba ina siri iliyowekwa vizuri chini ya ardhi ya bioanuwai, mchanga wenye rutuba, pwani na watu wenye nguvu.
“Leo tunasema kwa ulimwengu, Pemba iko wazi kwa uwekezaji na biashara,” amesema waziri huyo.
Hata hivyo, amesema watahakikisha wanafuata kikamilifu uwekezaji unaoambatana na maono ya Maendeleo ya Kitaifa 2050, hasa katika usindikaji wa mazao ya kilimo na kuongeza thamani kwa manukato, mwani na matunda ya Kitropiki, utalii na uchumi wa bluu.
Naye Mkurugenzi Mtendaji wa Zipa, Saleh Saad Mohamed amesema eneo hilo lina ukubwa hekta za mraba 800.1 na tayari wawekzaji wameanza kuonesha nia ya kuwekeza
Kongamano hilo limeenda sambamba na uzinduzi rasmi wa jarida la uwekezaji la Zanzibar, ambalo litaonyesha masimulizi yetu ya uwekezaji kwa watazamaji wa ndani na nje ya nchi, kuzinduliwa kwa mpango mkakati wa Zipa 2025/2030, kuanzishwa kwa awamu ya pili ya dirisha la kielektroniki la uwekezaji Zanzibar na kuzinduliwa kwa ripoti ya mwaka ya uwekezaji.
