Moscow, Urusi. Takriban watu 49 wanahofiwa kufariki dunia baada ya ndege ya abiria kuanguka katika eneo la Mashariki ya mbali mwa Russia.
Ndege hiyo aina ya Antonov An-26, inayomilikiwa na shirika dogo la ndege la Angara, ilipoteza mawasiliano na kituo cha kudhibiti safari asubuhi ya leo Alhamisi Julai 24, 2025 muda mfupi kabla ya kutua katika uwanja wa ndege wa Palana, Mkoa wa Kamchatka.
Shirika la habari la serikali, TASS, limenukuu vyanzo vya uokoaji vikisema kuwa ndege hiyo ilikuwa na watu 49 waliokuwa wakisafiri kutoka mji wa Petropavlovsk-Kamchatsky kwenda Palana wakiwemo abiria na wahudumu wa ndege.
Mabaki ya ndege aina ya Antonov An-26 iliyoanguka karibu na mwambao wa bahari ya Okhotsk.
Taarifa za awali zinaeleza kuwa mabaki ya ndege hiyo yamepatikana karibu na mwambao wa bahari ya Okhotsk, huku juhudi za uokoaji zikikumbwa na changamoto ya hali mbaya ya hewa.
Rais wa Russia, Vladimir Putin, ametuma salamu za rambirambi kwa familia zilizopoteza jamaa zao na kutoa maagizo kwa mamlaka husika kuendesha uchunguzi wa kina kubaini chanzo cha ajali hiyo.
“Tunaungana na familia zilizopoteza wapendwa wao kwenye tukio hili la kusikitisha,” amesema msemaji wa Kremlin, Dmitry Peskov.
Ndege za An-26 zimekuwa zikitumika kwa miongo mingi nchini Russia, lakini zimewahi kuhusika katika ajali kadhaa, jambo linalozua maswali kuhusu usalama wa ndege kongwe zinazotumika kwenye maeneo ya mbali.
Shirika la kitaifa la uchunguzi wa ajali za anga limesema limeanzisha uchunguzi rasmi huku vikosi vya uokoaji vikiendelea na kazi ya kutafuta manusura, ingawa matumaini yanaelezwa kuwa madogo.
Ajali hii imekuja wakati ambapo Russia bado inaendelea kukumbwa na changamoto za miundombinu ya usafiri katika maeneo ya mbali, hususan wakati wa majira ya baridi na msimu wa mvua.
