Dar es Salaam. China imesisitiza tena dhamira yake ya kuendelea kusaidia juhudi za kisasa za Jeshi la Ulinzi la Wananchi wa Tanzania (JWTZ), katika hatua inayolenga kuimarisha ushirikiano wa kijeshi kati ya mataifa haya mawili na kukuza amani na utulivu wa kikanda na kimataifa.
Akizungumza katika sherehe za maadhimisho ya miaka 98 ya Jeshi la Ukombozi wa China (PLA) zilizofanyika jijini hapa, Balozi wa China nchini Tanzania, Mingjian Chen, alisifu ushirikiano wa muda mrefu wa kijeshi kati ya PLA na JWTZ, akieleza kuwa ni wa kudumu, wa karibu na wenye mafanikio.
“Kwa kipindi cha miaka 61 iliyopita, PLA na JWTZ wamefurahia uhusiano thabiti, wa karibu na wa kirafiki,” alisema Balozi Chen. “Tumeshirikiana mara kwa mara katika ziara za viongozi wa ngazi za juu, mazoezi ya pamoja, ujenzi wa miundombinu, utoaji wa vifaa na mafunzo, na mafanikio yake yamekuwa dhahiri.”
Akitaja mafanikio ya hivi karibuni ya ushirikiano huo, Balozi Chen alieleza kuhusu ziara ya Waziri wa Ulinzi na Jeshi la Kujenga Taifa wa Tanzania, Dk Stergomena Tax, aliyoifanya nchini China mwaka jana, pamoja na zoezi la pamoja la kijeshi la Amani Umoja 2024, ambalo alilitaja kuwa kubwa zaidi kuwahi kufanyika kati ya majeshi hayo mawili.
Meli ya hospitali ya Jeshi la Wanamaji wa PLA, Ark Peace, pia ilitembelea Tanzania mwaka 2024, ikiwa ni ziara yake ya tatu nchini humo, jambo ambalo linaifanya Tanzania kuwa nchi pekee barani Afrika kutembelewa na meli hiyo mara tatu.
Zaidi, Balozi Chen alisema China itaendelea kuunga mkono safari ya JWTZ ya kujikomboa kiteknolojia na kisasa, ikiwa ni pamoja na teknolojia ya ulinzi, ujenzi wa uwezo na uhamishaji wa maarifa ya kimkakati.
“China itaendelea kutoa msaada na kuunga mkono juhudi za kisasa za JWTZ,” alisema. “Lengo letu ni kuimarisha ushirikiano wa pande mbili na kuunda mfano wa ushirikiano wa kiusalama kati ya China na Afrika.”
Kauli zake zinakuja wakati Tanzania ikijiandaa kuadhimisha miaka 61 ya JWTZ tarehe 1 Septemba. Balozi Chen aliupongeza mfumo wa ulinzi wa nchi kwa mafanikio yao katika kulinda uhuru wa kitaifa na kuchangia katika amani ya kikanda.
Mbali na ushirikiano wa kijeshi, Balozi Chen aliuweka uhusiano wa China na Tanzania katika muktadha mpana zaidi wa kihistoria na kimataifa. Alibainisha kuwa mwaka huu pia ni maadhimisho ya miaka 80 ya ushindi wa Vita ya Wananchi wa China Dhidi ya Uvamizi wa Kijapani na Vita ya Dunia Dhidi ya Ufasisti.
“Historia imetufundisha kuwa amani haipatikani kirahisi na ni lazima ilindwe,” alisema. “China inaendelea kushikilia maendeleo ya amani, mkakati wa manufaa ya pamoja, na kujenga jumuiya ya kimataifa yenye mustakabali wa pamoja.”
Aliongeza kuwa PLA inaendelea kuwa na mchango mkubwa katika operesheni za kulinda amani na misaada ya kibinadamu duniani kote, zikiwemo operesheni za ulinzi wa majini na ushirikiano wa kimataifa katika ngazi za pande mbili na za kimataifa.
“Tunaamini kuwa China iliyo imara na iliyoendelea zaidi itakuwa nguvu madhubuti zaidi ya kulinda amani duniani,” alihitimisha balozi huyo.
Kwa upande wake mgeni rasmi katika sherehe za maadhimisho hayo Mnadhimu Mkuu wa JWTZ Salum Othman alisema PLA ni miongoni mwa majeshi thabiti duniani ambalo linahakikisha usalama wa China na dunia kwa ujumla.
“Tangu kuasisiwa kwake mwaka 1927 PLA ni miongoni mwa majeshi dhabiti na imara duniani ambalo si tu kwa ajili ya ulinzi wa China bali usalama wa dunia nzima,” alisema Luteni Jenerali.
Kuhusu ushirikiano wa PLA na JWTZ Othman alisema majeshi hayo mawili yamekuwa na urafiki wa muda mrefu ambao wamekuwa wakisaidiana katika teknolojia za ulinzi, mafunzo na mengine ambayo yanasaidia Tanzania kuwa salama na ulimwengu kwa ujumla.
