Mahakama Kuu ya Tanzania leo inatarajiwa kuanza kusikiliza kesi ya kupinga kuenguliwa kwa mgombea urais wa ACT-Wazalendo, Luhaga Mpina, hatua ambayo huenda ikaathiri mwelekeo wa Uchaguzi Mkuu unaotarajiwa kufanyika Oktoba 29 mwaka huu.
Kesi hiyo imepewa kipaumbele kufuatia maombi ya dharura yaliyowasilishwa na ACT-Wazalendo, ikidai kuwa uamuzi wa Msajili wa Vyama vya Siasa na Tume Huru ya Taifa ya Uchaguzi (INEC) kumwondoa Mpina katika kinyang’anyiro ulikuwa kinyume cha sheria na haki za kidemokrasia.
Kwa mujibu wa mawakili wa chama hicho, Mahakama leo itasikiliza hoja za awali ili kubaini kama zuio hilo lilikuwa halali kisheria au ni uamuzi wa kiutendaji uliopita mipaka ya kikatiba.
Iwapo Mpina atashinda shauri hilo, anaweza kurejeshwa rasmi kwenye orodha ya wagombea urais na hivyo kuongeza ushindani wa kisiasa kuelekea uchaguzi mkuu. Lakini endapo kesi itatupiliwa mbali, itamaanisha uchaguzi utafanyika bila ACT-Wazalendo kuwa na mgombea wa urais.
Wachambuzi wa siasa wanasema kesi hii itakuwa kipimo muhimu cha namna taasisi za kisheria zinavyoshughulikia migogoro ya kisiasa, hasa katika kipindi nyeti kuelekea uchaguzi mkuu.
Related
