Maporomoko makubwa ya ardhi yamefuta kijiji cha Tarasin kilichopo katika eneo la Darfur, Sudan, na kusababisha vifo vya takribani watu 1,000. Hili limekuwa moja ya majanga mabaya zaidi kuwahi kushuhudiwa katika historia ya karibuni ya taifa hilo.
Tukio hilo lilitokea Jumapili baada ya mvua kubwa kunyesha kwa siku kadhaa mfululizo katika Milima ya Marrah, safu ya volkeno iliyoko katikati ya Darfur. Kwa mujibu wa taarifa za Harakati ya Ukombozi wa Sudan (SLM-A), mtu mmoja pekee ndiye aliyebaki hai. Janga hili limekuja wakati Sudan ikikumbwa na vita vya wenyewe kwa wenyewe vilivyoanza Aprili 2023, ambavyo tayari vimesababisha vifo vya zaidi ya watu 40,000 na kuwalazimisha mamilioni kukimbia makazi yao.
Milima ya Marrah, ambayo hapo awali ilikuwa kimbilio kwa familia zilizokuwa zikikimbia mapigano, sasa imegeuka kuwa chanzo cha maafa. Hali hii imeacha maelfu ya watu wakiwa wamepoteza ndugu, jamaa, na mali zao kwa ghafla, na kuongeza mateso katika eneo ambalo tayari limekuwa likiugua kutokana na ukosefu wa amani kwa miongo kadhaa.
Umoja wa Mataifa na mashirika ya misaada wanatoa wito kwa mataifa duniani kuingilia kati haraka ili kuokoa maisha na kupunguza madhila ya watu wa Darfur.
Related
