Klabu ya Benfica imechukua uamuzi mzito baada ya kupoteza mchezo wao wa kwanza wa Ligi ya Mabingwa Ulaya dhidi ya Qarabağ. Timu hiyo maarufu kutoka Ureno imetangaza kutengana na kocha wake mkuu na sasa imeamua kumgeukia gwiji wa soka duniani, José Mourinho.
Kwa mujibu wa ripoti za mwandishi wa habari za usajili, Fabrizio Romano, Mourinho amekubali ofa ya kuifundisha Benfica na tayari ametoa “ndiyo” yake ya mdomo. Kandarasi hiyo itamuweka pale Estádio da Luz hadi Juni 2027, huku hatua za mwisho zikitarajiwa kukamilishwa ndani ya saa 24. Tangazo rasmi linatarajiwa kutolewa muda wowote kuanzia sasa.
Hii si mara ya kwanza kwa Mourinho kukaa kwenye benchi la ufundi la Benfica. Mwaka 2000/2001, mwanzoni kabisa mwa maisha yake ya ukocha, alipata nafasi ya kuinoa klabu hiyo. Hata hivyo, kipindi chake kilikuwa kifupi—michezo 10 pekee kwa muda wa miezi minne ambapo alishinda mitano, kutoka sare mitatu na kupoteza miwili.
Mara ya mwisho, Mourinho alikua akihudumu nchini Uturuki na klabu ya Fenerbahçe. Hata hivyo, hakufanikiwa kushinda ubingwa wa ligi ya ndani wala kuifikisha timu hiyo kwenye hatua ya Ligi ya Mabingwa Ulaya.
Sasa, akiwa na umri wa miaka 62, “The Special One” anarudi tena nyumbani Ureno, safari hii akibeba matarajio makubwa ya kuirejesha Benfica kileleni mwa soka la ndani na pia kupigania hadhi yao barani Ulaya.
Kwa mashabiki wa Benfica, kurejea kwa Mourinho si tukio la kawaida tu. Ni hadithi ya kurudi nyumbani kwa kocha mwenye historia kubwa, safari ya mzunguko kamili kutoka pale alipoanzia safari yake ya ukocha hadi sasa alipofikia kuwa mmoja wa makocha maarufu zaidi duniani.
Related
