Na Mwandishi Wetu
Katika zama hizi ambapo teknolojia inaongoza maisha ya kila siku, kampuni ya Yas, kwa kushirikiana na ZTE, imezindua rasmi simu mpya aina ya ZTE Blade A36 na Blade A76—zikilenga kumfikisha Mtanzania wa kawaida kwenye dunia ya kidijitali bila mzigo wa gharama kubwa.
Simu hizi, ambazo ni maboresho ya matoleo ya awali ya ZTE A35 na A75, zimekuja na kamera zenye ubora zaidi, uwezo mkubwa wa utendaji na urahisi wa upatikanaji kupitia njia za malipo rafiki. Kwa maneno mengine, sasa si lazima uwe na pesa nyingi ili uende na wakati wa kidijitali.
Kwa mujibu wa Yas, simu hizo zinapatikana katika maduka yote ya kampuni hiyo nchini kwa njia ya malipo ya papo kwa papo au kwa mpango wa mkopo wa hadi miezi 12, ambapo wateja wanaweza kulipia kwa kiasi kidogo kinachoanzia Tsh 700 kwa siku, huku wakipata bando la masaa 24 kila siku. Wale watakaolipa fedha taslimu, watanufaika na bando ya mwaka mzima—zawadi isiyo ya kawaida katika soko la sasa.
Akizungumza katika uzinduzi huo, Imelda Edward, Meneja wa Vifaa na Huduma za Intaneti wa Yas, alisema:
“Tunataka kila Mtanzania awe sehemu ya uchumi wa kidijitali. Hii si tu kuhusu simu, ni kuhusu kuunganisha maisha na fursa.”
Kwa upande wake, Duan Cunxin, Meneja Mkaazi wa ZTE, alieleza kuwa Tanzania ni soko lenye kasi ya ukuaji wa kidijitali, na kwamba ushirikiano wao na Yas unalenga kuziba pengo la kijamii kwa njia ya teknolojia inayolipika na kutumika kwa urahisi.
Simu hizi mpya zimeingia sokoni wakati ambao matumizi ya intaneti ya simu yamepanda kwa zaidi ya asilimia 36.75 nchini, jambo linaloonesha kiu ya Watanzania katika kuunganishwa na ulimwengu wa kidijitali. Kwa bei zake nafuu na ofa za mikopo ya kipekee, Blade A36 na A76 zinatarajiwa kuvuruga soko la simu za kati na chini nchini.
Kwa uzinduzi huu, Yas na ZTE wanatoa ujumbe mmoja mzito: teknolojia si ya watu wachache tena – ni haki ya kila Mtanzania.
– MWISHO –
