Mahakama yakataa ombi la ushahidi wa mdomo kesi ya Polepole

Shauri hilo la maombi namba 24514/2025 linalosikilizwa na Jaji Mfawidhi, Salma Maghimbi, lilifunguliwa na wakili Peter Kibatala kwa niaba ya Polepole, Oktoba 7, 2025, chini ya hati ya dharura, dhidi ya Mkuu wa Jeshi la Polisi (IGP) na wenzake.

Wajibu maombi wengine kwa mfuatano ni Mkurugenzi wa Mashtaka (DPP), Mwanasheria Mkuu wa Serikali (AG), Mkuu wa Upelelezi wa Kanda Maalumu Dar es Salaam (ZCO) na Kamanda wa Polisi Kanda Maalumu Dar es Salaam (ZPC).

Akitoa uamuzi Jaji Maghimbi alisema ingawa vifungu vya sheria vilivyotajwa na mawakili wa pande zote vinaruhusu Mahakama kupokea ushahidi wa mdomo, lakini shauri hilo tangu linaanza limekuwa linaendelea kwa utaratibu wa viapo.

Amesema Mahakama inaweza kubadili utaratibu huo kama kungekuwa na sababu za msingi.

Jaji amesema kwa kuwa ushahidi unaodaiwa ulitokea Julai, waombaji walikuwa na nafasi ya kufanya hivyo mapema na kwamba, waliomba kuleta kiapo cha ziada lakini leo wanaomba tena kuleta ushahidi mwingine kwa mdomo.

Jaji Maghimbi amesema Mahakama imesimamisha shughuli nyingine na kutenga muda kwa ajili ya shauri hilo na kutokana na uharaka wake, mahakama inalikataa ombi hilo.

“Hivyo, maombi ya kuleta ushahidi kwa mdomo wa Christina Hezron Polepole yamekataliwa na Mahakama itaendelea kusikiliza maombi yaliyokwisha kuwasilishwa mahakamani,” amesema.

‎Ombi lilivyowasilishwa

‎Wakati shauri lilipotajwa, Kibatala, kiongozi wa jopo la mawakili wa Polepole akishirikiana na mawakili Faraji Mangula na Gloria Ulomi, aliieleza Mahakama leo asubuhi amepata taarifa kutoka kwa Christina, dada wa Polepole ambazo ni muhimu mahakama kuzifanyia kazi.

Amesema Christina amemweleza kuwa Julai 17, 2025 aliwekwa chini ya ulinzi na maofisa wa Polisi nyumbani kwake Bahari Beach, Dar es Salaam, wakiongozwa na Naibu Mkuu wa Upelelezi Kanda ya Dar es Salaam (DZCO), George Byagemu (Bagyemu).

Amesema Christina amemweleza alipigwa na maofisa hao wa polisi wakiongozwa na Byagemu na walimuhoji kuhusu alipo Balozi Polepole.

“Maoni yetu ni kwamba taarifa hiyo ina value (thamani) katika kutoa uamuzi wa maombi yaliyoko mbele ya mahakama, hasa kwa kuzingatia taarifa zilizotajwa katika viapo kuhusu wapi alipo na nani wanaomshikilia,” amesema Kibatala.

Amesema kifungu cha 413(2) cha CPA kinaipa Mahakama mamlaka ya kuratibu mwenendo wake katika mashauri kama hayo ili kufikia haki na kwamba, kifungu cha 416(1) kinaipa mahakama mamlaka ya kupokea maombi kwa mdomo au kwa maandishi. Alisema wao wanatoa maombi hayo kwa mdomo.

Wakili Kibatala amesema kwa kuwa hakuna ubishi kuwa kiapo ni ushahidi na kwa kuwa tayari kuna ushahidi kwenye kumbukumbu, mahakama ina mamlaka ya kupokea ushahidi wa ziada.

Kibatala amesema kwa kuwa shauri hilo limefunguliwa chini ya hati ya dharura wanaomba Mahakama iridhie kupokea ushahidi wa mdomo wa Christina, kuhusu eneo hilo chini ya kiapo, kwa kuwa litasaidia kupata ukweli.

Akijibu ombi hilo, Wakili wa Serikali, Ayoub Sanga amesema wanapinga maombi hayo kwa kuwa yaliyomo Mahakama yamewasilishwa chini ya hati ya dharura na kwa kuonesha udharura wenyewe, Mahakama imelipa uzito suala hilo.

Alidai Oktoba 9, 2025 wakili wa mwombaji aliomba kuwasilisha kiapo cha ziada na hawakupinga kwa sababu alieleza kuna taarifa ambazo familia wanapaswa kumpa.

Sanga amedai kuwa, leo wakili wa mwombaji baada ya kusoma viapo vyao kinzani vilivyowasilishwa mahakamani ndipo amekuja na maombi kuwa, kuna taarifa anataka aiongeze, ambayo alikuwa nayo miezi mitatu nyuma.

“Kwa hiyo, kwa upande wetu tunaona kuna nia ya wazi ya wenzetu kutaka kuchelewesha shauri hili kwa kuwa walipaswa kuwasilisha taarifa zote kwenye kiapo cha ziada,” amesema.

Amesema kama Mahakama itamruhusu anayetaka kuleta ushahidi akitoa tuhuma dhidi ya DZCO George Byagemu, yeye hataweza kupata fursa ya kujitetea ili kukinzana na shahidi huyo.

Amesema katika hali hiyo kutakuwa na ukiukwaji haki kwa kuwa, kuna mtu hatapata haki ya kusikilizwa kuhusu tuhuma hizo.

Vilevile, amesema kwa mujibu wa Kanuni ya 2 ya Kanuni za Mashauri hayo Tangazo la Serikali (GN) Namba 150 la mwaka 1930, baada ya kuwasilisha kiapo kinachofuata ni kiapo kinzani na kwamba, kama kuna taarifa za ziada zinaongezwa kwa kuwasilisha kiapo cha ziada.

Amedai kama kwenye kiapo kinzani kuna hoja za kujibu, basi upande kinzani unawasilisha kiapo kujibu kiapo kinzani na si utaratibu wa shahidi kutoa ushahidi kwa mdomo.

Kwa upande wake, wakili Nguka amedai Mahakama inaendeshwa na kanuni na moja ya kanuni hizo ni kila shauri lazima lifikie mwisho. Alidai maombi yaliyowasilishwa yanafungua milango ya shauri kutokufika mwisho.

“Tunaomba Mahakama yako tukufu isiingie kwenye mtego wa kuchelewesha shauri hilo ambalo wamelifungua kwa hati ya dharura. Sisi wajibu maombi tunaogopa mtego huo na tunaomba Mahakama yako iendelee na usikilizwaji wa shauri,” amesema.

Amesema kama Mahakama itaona kuna umuhimu wa kupokea ushahidi wa Christina, basi waulete kwa maandishi kupitia kiapo ili nao wapate kukijibu baada ya kukutana na DZCO ili kujiridhisha iwapo Julai 17, 2025 (miezi mitatu) alimuweka chini ya ulinzi.

“Hivyo, tunaomba maombi haya yatupiliwe mbali ili tuendelee na usikilizwaji wa shauri hili leo ili kuwatendea haki waleta maombi,” amesema.

Wakili Kibatala akijibu hoja kuhusu kiapo cha ziada walichowasilisha awali amesema alikiwekea msingi kuwa, taarifa alikuwa amezipata siku hiyo.

Hata hivyo, amesema mashauri hayo yanalenga kupata taarifa kujua mtu yuko wapi na nani anamshikilia na kama yuko hai au la.

Amesema hiyo si kesi ya mikataba bali ni suala la uhai na kifo, hivyo hata taarifa zinapokuja kwa wakili zinakuja kwa muktadha huo.

“Hoja kwamba nilikuwa nazifahamu taarifa hizo tangu Julai 17 sijui wenzetu wamezitoa wapi. Lakini pia anayeombewa kutoa ushahidi si mimi bali nimesema toka mwanzo kuwa ushahidi huo utaongeza thamani,” amesema.

Amesisitiza kuwa, Mahakama inahitaji ushahidi ili kufikia haki na kwamba, utaratibu wa kutoa ushahidi kizimbani kwa kiapo ndiyo unaokoa muda.

Kibatala amesema Bunge liliona kuwa, mashauri hayo ni muhimu, kwa kuwa yanahusu uhai wa mtu ndiyo maana likatunga sheria kuwa Mahakama inaweza kuratibu mwenendo wake jambo ambalo alieleza hajaliona katika mashauri mengine.

Amedai madai ya mawakili wa wajibu maombi kuwa maombi ya ushahidi huo yamekuja baada ya kusoma viapo vyao kinzani si ya kweli, kwani kwenye viapo vyao hawajamtaja DZCO Byagemu.

Amesema shahidi huyo akipanda kizimbani ataweza kuhojiwa na kwa kuwa kuna wakili amepata kiapo na kwa niaba ya ofisi ya ZCO.

Kibatala alisisitiza kuwa, kupokea ushahidi kwa mdomo badala ya kiapo si jambo jipya, akiielekeza Mahakama katika shauri la Halima Mdee na wenzake dhidi ya Chadema.

Vilevile, amesema hakuna mtego mbaya kwenye shauri kama hilo linalomhusu mtu maarufu.

Katika hatua nyingine, kabla ya kuanza usikilizwaji huo Wakili wa Serikali Mwandamizi, Faraji Nguka aliiomba Mahakama iridhie wawaite watu waliokula viapo kwenye shauri hilo upande wa mwombaji, Peter Kibatala na Godfrey Polepole ili kuwahoji maswali ya dodoso kuhusu taarifa zilizomo katika viapo vyao.

Ombi hilo lilipingwa na Kibatala akirejea uamuzi wa Mahakama katika ombi la kumuita Christina kwamba hawezi kumuita kulingama na uharaka wa shauri hilo.

Wakili wa Serikali Ayoub Sanga amesema Mahakama  haijafungwa na uamuzi ilioutoa kuhusu ombi la Christina Polepole kwa kuwa,  mazingira ya uamuzi huo na maombi yao ni tofauti.

Jaji Maghimbi ameahirisha shauri hilo mpaka kesho Oktoba 16, 2025 kwa ajili ya uamuzi wa maombi ya Jamhuri.