Mkuu wa Mkoa wa Dar es Salaam, Albert Chalamila, ameagiza kurejeshwa kwa huduma za mabasi ya mwendokasi katika kituo cha Mbagala kuanzia Alhamisi, Novemba 20, 2025, kama sehemu ya hatua za awali za serikali baada ya vurugu zilizotokea kufuatia uchaguzi mkuu wa Oktoba 29.
Chalamila alitoa agizo hilo wakati wa ziara ya kukagua vituo vya mwendokasi vilivyoharibiwa katika Wilaya ya Temeke, huku akisisitiza kuwa serikali ina wajibu wa kuhakikisha wananchi wanapata huduma muhimu bila kuchelewa — hususan maeneo yaliyoathiriwa zaidi kama Mbagala.
Ombi la DC Mapunda Lamfikisha Chalamila Mbagala
Uamuzi huo umechochewa na ombi la Mkuu wa Wilaya ya Temeke, Sixtus Mapunda, ambaye aliomba kurejeshwa haraka kwa baadhi ya huduma muhimu, ikiwemo usafiri wa mwendokasi, ili kupunguza usumbufu unaowakumba wakazi wa Mbagala na maeneo jirani.
Uharibifu Mkubwa, Lakini Hakuna Shule Iliyochomwa
Akiendelea kutoa taarifa kuhusu hali ya uharibifu, Chalamila alisema licha ya uharibifu mkubwa uliofanywa kwenye vituo vya mwendokasi, hakuna shule yoyote mkoani Dar es Salaam iliyoripotiwa kuchomwa au kuharibiwa kutokana na machafuko hayo.
Chalamila amesema serikali inaendelea na tathmini ya uharibifu wa mali za umma na binafsi, hatua itakayowezesha kupangwa kwa mkakati madhubuti wa kurejesha miundombinu na huduma za kijamii.
RC Chalamila Atoa Wito wa Amani
Mkuu huyo wa mkoa pia ametoa wito kwa wakazi wa Dar es Salaam kuendelea kuwa watulivu, kudumisha amani, mshikamano na upendo, akisisitiza kuwa mitazamo ya juu juu kuhusu misuguano ya kisiasa inaweza kusababisha mgawanyiko na kutoa nafasi kwa maadui wa taifa kuvuruga amani.
Related
