Rais wa Marekani Donald Trump amesema vita dhidi ya Iran vimekaribia kukamilika kabisa, akidai kuwa Iran ilikuwa inapanga kuishambulia Marekani ndani ya wiki moja, kwa asilimia 100.
Rais huyo alisema mashambulizi ya Marekani na Israel yaliyodumu kwa siku 10 yameharibu kabisa jeshi la majini, jeshi la anga pamoja na mifumo ya mawasiliano ya Iran.
Kauli hiyo ya ghafla ilisababisha bei ya mafuta duniani kushuka hadi chini ya dola 90 kwa pipa, baada ya hapo awali kufikia karibu dola 120 kwa pipa.
Akizungumza na CBS News, Trump alisema: “Nadhani vita vimekaribia kukamilika kabisa. Ukiangalia sasa, hawana chochote kilichobaki.
Hawana jeshi la majini, hawana mawasiliano, hawana jeshi la anga. Kumaliza vita hivi ni suala la muda tu.”
Baadaye katika hotuba yake kwa wanachama wa chama cha Republican katika makazi yake ya Mar-a-Lago huko Florida, alisema:
“Tulifanya operesheni ndogo kwa sababu tuliona ni lazima tuwaondoe baadhi ya watu.”
Aliendelea kusema: “Tayari tumeshinda kwa njia nyingi, lakini bado hatujashinda kikamilifu. Tutaendelea mbele kwa dhamira kubwa zaidi hadi tupate ushindi wa mwisho utakaoondoa hatari hii kabisa.”
Akielezea sababu ya kuanzisha mashambulizi dhidi ya Iran siku 10 zilizopita, Trump alisema aliamini Iran ilikuwa inapanga kuishambulia Marekani.
“Nilidhani walikuwa wanakwenda kutushambulia. Walifanya jambo la kijinga sana kwa kushambulia majirani zao. Majirani hao hawakuwa na mpango wa kuwashambulia, lakini baada ya kushambuliwa waliungana na sisi.”
Trump pia alisema kuwa Marekani imepiga zaidi ya malengo 5,000 ndani ya Iran, ikiwemo meli 51 za kivita.
Vita hivyo vilianza kufuatia kuuawa kwa Kiongozi Mkuu wa Iran Ali Khamenei katika mashambulizi ya pamoja ya Marekani na Israel tarehe 28 Februari. Baada ya tukio hilo, Iran ilijibu kwa mashambulizi ya makombora na droni dhidi ya maeneo mbalimbali ya Ghuba.
Baada ya kifo chake, mwanawe Mojtaba Khamenei alichukua nafasi ya Kiongozi Mkuu wa Iran.
Trump pia alisema alifanya mazungumzo ya simu na Rais wa Urusi Vladimir Putin, ambapo walijadili vita vya Iran na pia vita vya Ukraine. Trump alidai kuwa Putin alionyesha nia ya kusaidia kutatua mgogoro huo.
Kwa upande mwingine, Putin awali alitoa msaada wake kwa kiongozi mpya wa Iran Mojtaba Khamenei.
Wakati huo huo, Iran imeendelea kurusha makombora na droni katika nchi mbalimbali za Mashariki ya Kati zikilenga vituo vya Marekani. Nchi za Ghuba kama Bahrain zimekumbwa na mashambulizi kadhaa tangu kuuawa kwa Ali Khamenei.
Trump alionya kuwa Iran isijaribu kufanya “ujanja wowote”, akisema Marekani iko karibu kumaliza kabisa uwezo wa Iran kudhibiti usafirishaji wa mafuta kupitia mlango muhimu wa bahari wa Hormuz.
Aliongeza:
“Sitakubali utawala wa kigaidi kuiteka dunia kwa kutishia usambazaji wa mafuta. Ikiwa Iran itajaribu kufanya hivyo, tutawapiga kwa nguvu kubwa zaidi.”
