Jeshi la Marekani limesema limepiga hatua kubwa katika kudhoofisha uwezo wa kijeshi wa Iran tangu kuanza kwa operesheni za kijeshi dhidi ya nchi hiyo, huku likieleza kuwa mashambulizi ya Iran yamepungua kwa kiwango kikubwa.
Akizungumza katika mkutano na waandishi wa habari leo Machi 10, 2026 Mwenyekiti wa Wakuu wa Majeshi ya Marekani, Dan Caine, alianza kwa kuwaheshimu wanajeshi wa Marekani waliopoteza maisha katika vita vinavyoendelea dhidi ya Iran.
“Kwa familia za wapendwa wetu waliopotea, tunashiriki huzuni yenu kubwa,” alisema, akitoa salamu za pole kwa ndugu na jamaa wa wanajeshi waliouawa vitani.
Caine alieleza kuwa operesheni za kijeshi za Marekani zimepunguza kwa kiasi kikubwa mashambulizi kutoka Iran.
Kulingana na tathmini ya jeshi la Marekani, mashambulizi ya makombora ya balistiki kutoka Iran yamepungua kwa takribani asilimia 90 ikilinganishwa na kipindi cha mwanzo wa vita.
Aidha, mashambulizi ya ndege zisizo na rubani (drones) za kujitoa muhanga yamepungua kwa asilimia 83 tangu kuanza kwa operesheni hiyo, jambo ambalo jeshi la Marekani linaona kuwa ni mafanikio makubwa katika juhudi za kupunguza uwezo wa mashambulizi wa Iran.
Mbali na hilo, Caine alisema Marekani pia imefanikiwa kuharibu sehemu kubwa ya uwezo wa jeshi la majini la Iran. Alifichua kuwa zaidi ya meli 50 za kijeshi za Iran zimepigwa tangu vita vilipoanza.
Aliongeza kuwa mashambulizi hayo yamelenga pia kile alichokiita “miundombinu muhimu ya kijeshi na viwanda” vya Iran, hasa maeneo yanayohusika na utengenezaji wa drones za mashambulizi ya upande mmoja.
Kwa upande wake, Waziri wa Ulinzi wa Marekani, Pete Hegseth, alisema vita dhidi ya utawala wa Iran vina umuhimu mkubwa kwa Marekani, akieleza kuwa vina athari ya moja kwa moja kwa wanajeshi wa nchi hiyo.
“Kizazi chetu kinaelewa mapambano haya,” alisema, akiongeza kuwa kwa miaka mingi vikosi vinavyoungwa mkono na Iran vimekuwa vikishambulia wanajeshi wa Marekani kupitia makundi washirika katika maeneo mbalimbali ya Mashariki ya Kati.
Hegseth pia alidai kuwa Iran inaendelea kukimbilia kutengeneza silaha za nyuklia, lakini akasisitiza kuwa Rais wa Marekani, Donald Trump, hataruhusu jambo hilo kutokea.
Aidha, alishutumu vikosi vya Iran kwa kulenga raia katika mashambulizi yao, akisema hatua hiyo inaonyesha kuwa jeshi la Iran linaendelea kudhoofishwa na operesheni za kijeshi za Marekani.
“Iran iko peke yake katika vita hivi na inapoteza vibaya,” alisema Hegseth.
Kauli hizi zinakuja wakati mvutano wa kijeshi kati ya Marekani na Iran ukiendelea kuongezeka, huku pande zote zikitoa taarifa zinazoonyesha mafanikio ya operesheni zao katika uwanja wa vita.
