HASHIM AZIZ
March 23, 2026
0 Comments
Hospitali ya Kufundishia ya El Daein iliyopo Darfur Mashariki imeingia katika hali ya kufungwa kabisa baada ya kushambuliwa kwa shambulio la anga lililodaiwa kufanywa na Jeshi la Sudan siku ya kwanza ya Sikukuu ya Eid al-Fitr, tukio lililosababisha vifo na majeruhi kadhaa katika moja ya mashambulizi makali zaidi kuwahi kulenga kituo cha afya katika eneo hilo.
Kwa mujibu wa taarifa iliyotolewa na Wizara ya Afya inayohusishwa na muungano wa Sudan Founding Alliance, idadi ya vifo imefikia watu 64, wakiwemo watoto 13 na wanawake 7, pamoja na wahudumu wawili wa afya. Aidha, watu 98 wamejeruhiwa huku operesheni za kutafuta manusura na kutoa miili chini ya vifusi zikiendelea.
Wizara hiyo imeeleza kuwa shambulio hilo limesababisha uharibifu mkubwa katika idara ya dharura ya hospitali hiyo pamoja na miundombinu yake, hali iliyosababisha hospitali kufungwa kabisa. Pia imeripotiwa kuwa wahudumu kadhaa wa afya wamejeruhiwa.
Kwa upande wake, Ofisi ya Umoja wa Mataifa ya Kuratibu Masuala ya Kibinadamu (OCHA) imeeleza kushtushwa na shambulio hilo, ikisisitiza kuwa kulenga vituo vya afya ni ukiukwaji wa wazi wa sheria za kimataifa za kibinadamu na kuitaka pande zote zinazohusika na mzozo huo kuwalinda raia pamoja na taasisi za afya.
Wakati huo huo, soko la El Fasher nalo limeshambuliwa kwa shambulio la anga siku hiyo hiyo kwa kutumia ndege isiyo na rubani (drone) inayodaiwa kutengenezwa Uturuki aina ya “Carnegie”, kwa mujibu wa Wizara ya Afya. Shambulio hilo limesababisha vifo vya watu 23 na kujeruhi wengine 35, huku juhudi za kuwahudumia majeruhi zikiendelea katika Hospitali ya Saudi iliyopo mjini humo.
Muungano wa “Ta’sis” pia umeripoti kuendelea kwa mashambulizi kwa siku ya pili mfululizo, ambapo soko la hisa la El Fasher pamoja na eneo la Manawashi lililopo Darfur Kusini vimeshambuliwa, na kusababisha vifo na majeruhi zaidi, huku hali ya kijeshi katika eneo hilo ikiendelea kuzorota kwa kasi.
