:::::
Na Mwandishi Wetu
Benki ya Maendeleo ya Afrika Mashariki (EADB) imetia saini makubaliano ya kifedha yenye thamani ya shilingi bilioni 63.2 kwa ajili ya kuzisaidia taasisi tatu za kifedha nchini Tanzania kuimarisha uwezo wao wa kutoa mikopo kwa sekta mbalimbali za kimkakati.
Makubaliano hayo yamesainiwa jijini Dar es Salaam, yakihusisha taasisi za kifedha za TIB Development Bank, Azania Bank, na Taasisi ya Mikopo ya Nyumba (TMRC). Fedha hizo zinalenga kuimarisha huduma za kifedha zitakazochochea maendeleo katika sekta muhimu kama nishati, viwanda, miundombinu na madini.
Akizungumza wakati wa hafla ya utiaji saini, Mkurugenzi Mtendaji wa EADB, Bernard Mono alisema:
> “Mpango huu ni sehemu ya dhamira ya benki yetu kusaidia ukuaji wa uchumi kupitia taasisi za kifedha. Tunategemea kuwa mikopo itakayopatikana kupitia taasisi hizi itaongeza kasi ya maendeleo katika maeneo ambayo yana fursa kubwa ya uchumi jumuishi.”
Kwa upande wake, Kamishna wa Uendelezaji Sekta ya Fedha kutoka Wizara ya Fedha, ambaye pia ni Mwenyekiti wa Bodi ya EADB, Charles Mwamaja, alisema makubaliano hayo yanaendana na vipaumbele vya serikali katika kukuza uchumi shirikishi kwa kutoa fursa kwa wananchi wengi zaidi.
> “Lengo letu ni kuhakikisha Watanzania wanapata huduma za kifedha kwa urahisi, na fedha hizi zitaongeza mzunguko wa mitaji, kuimarisha ajira na kuboresha maisha ya watu kupitia miradi ya maendeleo.”
Kwa mujibu wa makubaliano hayo, Benki ya Maendeleo ya TIB imepata mtaji wa shilingi bilioni 30, Azania Bank imepatiwa shilingi bilioni 13.3, na TMRC imepokea shilingi bilioni 20 kwa ajili ya kuimarisha utoaji wa mikopo ya nyumba kwa wananchi.
Baadhi ya wanufaika wa mpango huo wamesema hatua hiyo itasaidia kuharakisha upatikanaji wa mitaji kwa wajasiriamali na wawekezaji wadogo, huku ikifungua fursa za ajira mpya, hasa kwa vijana.
Mpango huu wa EADB ni sehemu ya mkakati wake wa muda mrefu wa kuimarisha taasisi za kifedha katika ukanda wa Afrika Mashariki, ili kuchochea maendeleo endelevu na kujenga uchumi imara unaowezesha kila mwananchi kushiriki kikamilifu.
