Uchaguzi Mkuu wa Oktoba 2025 unakaribia, na taifa la Tanzania linaingia kwenye kipindi muhimu cha mchakato wa kidemokrasia.
Kwa Watanzania, huu si wakati wa kawaida tu, bali ni wakati wa kupima ukomavu wa siasa, uimara wa vyama vya siasa sambamba na taasisi mbalimbali na nafasi ya raia katika kuchagiza mustakabali wa taifa.
Wataalamu wa siasa na demokrasia mar azote huwa wanasisitiza kuwa ili kupata matokeo bora, Watanzania wanapaswa kuchukua nafasi ya pekee katika mchakato huu wa uchaguzi mkuu.
Wanasema hili jambo la msingi ambalo kila mtu mwenye mapenzi mema nan chi yake anapaswa kuzingatia.
Katika hili, kila Mtanzania mwenye sifa na vigezo sahihi vya kushiriki uchaguzi huu, anapaswa kulitambua hilo.
Mosi ni kutambua kwamba uchaguzi ni zaidi ya upigaji kura.
Ni wakati wa raia kutumia nafasi yao kikatiba kubadilisha au kuimarisha mwelekeo wa taifa.
Kwa mantiki hii, raia wanapaswa kwanza kutambua nafasi na wajibu wao wa kupata elimu sahihi kuhusu mchakato, kuelewa utaratibu na kushiriki bila woga au upendeleo usio na msingi.
Tunaambiwa uchaguzi ni wakati wa raia kuwa na madaraka kamili ya kutambua wajibu wake kwa nchi yake si kuwa mfuasi au mwanachama tu wa chama cha siasa.
Tume ya Taifa ya Uchaguzi inaendelea na mchakato wake wa kuboresha Daftari la Wapigakura.
Hili ni eneo lenye nafasi kubwa kwa raia. Daftari la Kudumu la Wapigakura ni chombo kinachotoa uhalali wa kushiriki uchaguzi.
Watanzania wanapaswa kuhakikisha wanajiandikisha au kuboresha taarifa zao ili sauti zao zisipotee.
Daftari bora ni msingi wa uchaguzi wa haki na raia wanapaswa kudai uwazi na usahihi wa mchakato huu.
Kutathmini wagombea kwa mizani ya uadilifu ni moja ya changamoto kubwa za siasa za Tanzania, hiyo pia husababisha kukosekana kwa utamaduni wa kumchunguza kiongozi kabla ya kumchagua.
Watanzania wanapaswa kubadilika kwa kuuliza maswali sahihi kama mgombea anasimamia sera zipi? Ana rekodi gani ya uadilifu? Ana mpango gani wa kuboresha maisha ya wananchi?
Huu si wakati wa ushabiki usio na tija, bali wakati wa kutumia akili, uchambuzi na tafakuri.
Lakini pia kuna suala la kudumisha amani ya nchi kama msingi wa demokrasia hasa katika kipindi hiki tunachokiendea.
Hakuna asiyefahamu kuwa amani ni mtaji wa taifa lolote lile na kipindi hiki cha uchaguzi mkuu ndicho muhimu hasa kwa Watanzania kudhihirisha ukomavu wao wa kisiasa. Hatupaswi kuruhusu siasa zipandikize chuki, ukabila au mifarakano. Badala yake, ni wakati wa kushindana kwa sera, maono na hoja.
Vyama, wagombea na raia wote wanapaswa kutanguliza amani juu ya masilahi binafsi au itikadi za vyama tunapouelekea mchakato wa kampeni.
Kipindi hiki cha kampeni si cha kushabikia kauli tupu pekee, bali ni wakati wa watanzania kushiriki mijadala, kuuliza maswali magumu na kudai wagombea waeleze kwa uwazi watakavyotatua changamoto za kijamii, kiuchumi na kisiasa.
Wananchi wanatakiwa kutumia nafasi hiyo kutambua kwamba kiongozi yupi ana dhamira thabiti ya kuijenga Tanzania bora.
Na ndicho kipindi ambacho wanapaswa kushirikiana na vyombo vya usimamizi wa uchaguzi na vyombo vya usalama kudhibiti vitendo viovu.
Matendo kama kutoa au kupokea rushwa, kuvuruga amani au kudhulumu mchakato wa kidemokrasia hayapaswi kupewa nafasi.
Watanzania wanapaswa kuwa walinzi wa haki na uadilifu, wakisimamia misingi ya katiba na sheria.
Watanzania tutambue kuwa baada ya kupiga kura kumalizika na matokeo kutangazwa, wanapaswa kukumbuka kwamba uchaguzi si mwisho wa safari.
Bali ni wakati wa kuungana, kushirikiana na uongozi mpya na kuendeleza umoja wa kitaifa bila kujali tofauti za kisiasa. Taifa ni moja, vyama ni vingi na kesho ya Tanzania ni yetu sote.
Hivyo, uchaguzi mkuu wa Oktoba 2025 ni mtihani muhimu kwa ukomavu wa demokrasia ya Tanzania.
Kwa raia, ni nafasi ya kudhihirisha busara, ukomavu na uzalendo. Kuanzia sasa, Watanzania tunapaswa kubeba jukumu la kipekee la kushiriki, kutafakari, kudai uwazi na kushirikiana kwa amani. Hatima ya taifa hili ipo mikononi mwa raia wake, hivyo wakati huu ni wa kutumia kwa busara ili nchi ivuke salama bila dhahama.