Habari zenu vijana wenzangu, nawasalimia kwa jina la Jamhuri ya Muungano wa Tanzania.
Katika maisha, heshima na utu wa mtu hujengwa na matendo yake, siyo maneno ya dharau. Kila kizazi hubeba wajibu wa kulinda heshima yake na kuweka msingi imara kwa vizazi vijavyo. Vijana ndio nguzo ya taifa, na kila neno tunaloandika leo linaweza kujenga au kubomoa kesho yetu.
Kumezuka kitabia cha matusi mtandaoni, jambo linaloleta ukakasi katika jamii yetu. Napenda kuwakumbusha vijana wenzangu kwamba mitandao ya kijamii si jukwaa la kutukanana, kubezana au kudhalilishana kwa sababu ya tofauti za kiitikadi au mitazamo. Tabia ya kujificha nyuma ya akaunti feki na kutumia lugha za matusi ni unyanyasaji wa kimaadili, haijengi chochote bali inavunja heshima binafsi na mshikamano wa jamii kwa ujumla.
Ni wajibu wetu kutumia mitandao hii kwa manufaa — kujielimisha, kujitangaza, kuunganisha fursa na hata kujiingizia kipato halali. Vijana, achemkeni na utamaduni wa kejeli na dharau, tokeni gizani; tumieni kalamu zenu za kidigitali kuandika mambo yenye tija na siyo matusi.
Nakemea vikali tabia ya kueneza uongo, uzushi, matusi na kejeli mtandaoni. Huo ni uharibifu wa heshima, utu na mshikamano wa kijamii.
FAIDA ZA KUTUMIA MITANDAO KWA BUSARA
● Kupata elimu na maarifa kwa urahisi kupitia makundi, mafunzo na kozi mtandaoni.
● Kupanua mitandao ya kijamii na kibiashara (networking) inayoweza kukupeleka mbali kitaaluma na kimaisha.
● Kujitangaza na kukuza biashara ndogo ndogo kupitia matangazo ya kidigitali.
● Kujifunza fursa za ajira na uwekezaji zinazopatikana dunia nzima.
● Kujenga sauti ya vijana kwa kushiriki mijadala yenye maana kwa taifa na jamii
HASARA ZA KUTUMIA MITANDAO VIBAYA
● Kuharibu heshima binafsi: Matusi na kejeli hubaki kama alama isiyofutika, hata miaka mingi baadaye.
● Kupoteza fursa za ajira: Waajiri wengi huangalia rekodi zako mitandaoni kabla ya kukupa kazi.
● Kufikishwa kwenye vyombo vya sheria kwa makosa ya uchochezi, matusi au uongo.
● Kuchafua jina la familia na jamii yako kwa tabia zisizo za heshima.
● Upotevu wa muda na nguvu kwenye mabishano yasiyo na tija badala ya kushiriki shughuli za maendeleo.
● Kuathiri afya ya akili kutokana na chuki na matusi ya mara kwa mara.
Kumbuka: Maneno yako mtandaoni yana nguvu. Yatumie kujenga, si kubomoa.
Na pia, kumbuka — kuna maisha yako ya kesho; utahukumiwa kwa kile ulichokipanda. Matendo ya sasa mtandaoni yanaweza kuleta madhara ya muda mrefu kwa sifa, fursa za kazi na mahusiano yako ya baadaye.
Tumia teknolojia kwa busara — jenga, endelea, na uwe mfano mzuri.
“Vijana wa leo ni viongozi wa kesho, tusichafue kesho kwa maneno ya leo”
