Kesi hiyo, ambayo sasa imefikia siku ya saba tangu kuanza kusikilizwa kwa hatua ya ushahidi, imeendelea kuvutia hisia za wananchi na wadau wa sheria kutokana na uzito wake wa kisiasa na kisheria.
Majira ya saa tatu asubuhi, shahidi Kahaya aliendelea kutoa ushahidi wake huku akijibu maswali ya dodoso kutoka kwa Lissu.
Kabla ya kuanza kwa mahojiano hayo, upande wa Jamhuri uliomba ruhusa kwa Mahakama ili kushiriki mazishi ya Msajili wa Mahakama Kuu Kanda ya Shinyanga, marehemu Asha Hamis Mwetindwa.
Wakili wa Serikali Mkuu, Renatus Mkude, aliieleza Mahakama kuwa mazishi hayo yamepangwa kufanyika leo saa saba mchana, hivyo wakaomba kesi iendelee kwa muda mfupi kabla ya kuahirishwa ili kutoa nafasi kwao kuhudhuria tukio hilo.
Baada ya ombi hilo kukubaliwa, Lissu aliendelea kumuhoji shahidi kwa kina kuhusu video inayodaiwa kuwa sehemu ya ushahidi muhimu katika kesi hiyo.
Alimuuliza kama alipata nafasi ya kuangalia tena video hiyo baada ya shauri kuahirishwa wiki iliyopita, lakini shahidi alijibu kuwa hakufanya hivyo.
Lissu aliendelea kumuuliza kuhusu mitandao mbalimbali iliyotajwa kuhusika katika kurusha video hiyo, ikiwemo Arusha One Digital, Mwanzo TV, Chanzo TV, na Jambo TV X, lakini shahidi alikiri kutokuwa na taarifa yoyote kuhusu mitandao hiyo.
Katika mahojiano hayo, Lissu alitaka kujua uelewa wa shahidi kuhusu sheria za uhaini, akimkumbusha kuwa kutoa kauli pekee hakuwezi kuhesabiwa kama kosa la uhaini bila kuwepo kwa nia ya kutenda kosa hilo.
Shahidi alithibitisha kuwa nia ya kutenda uhaini lazima ithibitishwe kupitia maandishi au matendo ya moja kwa moja.
Lissu pia alimuuliza kuhusu video yenyewe na masharti ya kisheria yanayoambatana nayo.
Shahidi alikiri kuwa video hiyo ilirushwa mubashara na Jambo TV, lakini hakufahamu ni nani aliyeichapisha wala wahusika wa kituo hicho, akibainisha kuwa hakufanya upelelezi wa kina kuhusu chombo hicho cha habari.
Aidha, katika uchunguzi wa ushahidi, Lissu alibainisha kuwa shahidi hakuwasilisha flash yenye video hiyo Mahakamani, na kwamba hakuna mtu mwingine aliyewahi kuiona zaidi yake.
Katika hatua nyingine, Lissu alimuuliza shahidi kuhusu Katiba ya Jamhuri ya Muungano wa Tanzania na sheria za uchaguzi, akisisitiza kuwa uchaguzi mkuu unasimamiwa na Tume Huru ya Taifa ya Uchaguzi (NEC), chombo huru kisichotakiwa kuingiliwa na mamlaka yoyote.
Shahidi alikiri baadhi ya hoja hizo, ingawa alionekana kusita kukumbuka baadhi ya taratibu za kisheria.
Lissu aliendelea kupitia mashitaka yanayomkabili, akibainisha kuwa maneno aliyoyasema hayahusiani moja kwa moja na Serikali, jambo ambalo pia shahidi alilithibitisha.
Mashtaka yanayomkabili Lissu ni ya uhaini chini ya Kifungu cha 39(2)(d) cha Sheria ya Kanuni za Adhabu, yanayohusiana na madai kwamba alitoa kauli zinazohusiana na mpango wa kudhibiti au kuzuia Uchaguzi Mkuu wa mwaka 2025.
Kesi hiyo imeendelea kuvuta hisia za wananchi na wadau wa sheria, huku vyombo vya habari vikifuatilia kwa ukaribu mwenendo wake. Wengi wanaona kesi hii kuwa na athari pana za kisiasa na kisheria nchini Tanzania, kutokana na nafasi ya Lissu katika siasa za upinzani.
Wakati mahojiano yakiendelea, Lissu amekuwa akisisitiza kuwa maneno aliyoyasema hayakuvuka mipaka ya uhuru wa maoni kama unavyolindwa na Katiba, huku shahidi akikiri kutokuwa na uhakika juu ya baadhi ya masharti ya kisheria yanayohusu makosa ya uhaini.
Kesi hiyo inaendelea, huku umma ukisubiri kwa hamu hatua inayofuata katika mchakato wa usikilizwaji wa ushahidi.
