Dodoma, Tanzania – Dkt. Samia Suluhu Hassan ameapishwa rasmi kuwa Rais wa Jamhuri ya Muungano wa Tanzania katika hafla ya kihistoria iliyofanyika katika Uwanja wa Gwaride, Ikulu ya Chamwino mkoani Dodoma, tarehe 03 Novemba 2025.
Uapisho huo uliongozwa na Jaji Mkuu wa Tanzania, George Mcheche Masaju, ambaye alisimamia kiapo cha uaminifu na cha uadilifu kwa mujibu wa Katiba ya Jamhuri ya Muungano wa Tanzania.
Baada ya kuapishwa, Rais Samia alipokea heshima ya kitaifa ikiwemo gwaride maalum la kijeshi lililoandaliwa na Jeshi la Ulinzi la Wananchi wa Tanzania (JWTZ), huku viongozi mbalimbali wa serikali, dini, vyama vya siasa, mabalozi na wananchi wakishuhudia tukio hilo.
Katika hotuba yake fupi baada ya kuapishwa, Rais Samia aliwashukuru Watanzania kwa imani waliyoonyesha kwake na akaahidi kuendelea kuimarisha misingi ya amani, umoja na maendeleo nchini. Alisisitiza dhamira ya serikali yake kuendelea kutekeleza miradi mikubwa ya kimkakati, kuboresha uchumi wa wananchi, na kuimarisha huduma za kijamii.
Sherehe hizo zilihudhuriwa pia na Makamu wa Rais, Waziri Mkuu, Spika wa Bunge, viongozi wa vyombo vya ulinzi na usalama pamoja na wageni waalikwa kutoka ndani na nje ya nchi.
Related
