Kim Jong Un, Binti Yake Wafyatua Risasi Kiwanda cha Silaha Korea Kaskazini

Kiongozi wa Korea Kaskazini, Kim Jong Un, ameonekana akifyatua risasi kwa bastola pamoja na binti yake, Kim Ju-ae, wakati wa ziara ya ukaguzi katika kiwanda cha kutengeneza silaha nyepesi nchini humo. Tukio hilo liliripotiwa na vyombo vya habari vya serikali, vikionyesha wawili hao wakishiriki majaribio ya silaha ndani ya kiwanda hicho.

Katika picha na video zilizotolewa, wawili hao walionekana wakiwa na mavazi yanayofanana huku wakipokea maelezo kutoka kwa maafisa wa kijeshi kuhusu uzalishaji wa risasi na silaha ndogo zinazotumiwa na jeshi la Korea Kaskazini, kabla ya kufyatua risasi katika eneo maalum la majaribio.

Kim Ju-ae amekuwa akionekana mara kwa mara katika matukio muhimu ya kijeshi na kitaifa, hali inayowavutia wachambuzi wa siasa wanaoamini kuwa huenda anaandaliwa kwa nafasi kubwa ya uongozi baadaye, ingawa serikali ya Korea Kaskazini haijawahi kutoa kauli rasmi kuhusu mrithi wa uongozi.

Familia ya Kim imeiongoza Korea Kaskazini kwa vizazi vitatu mfululizo, kuanzia Kim Il Sung, akifuatiwa na Kim Jong Il, hadi kiongozi wa sasa Kim Jong Un. Kuonekana kwa Kim Ju-ae katika shughuli za kijeshi kunazidi kuongeza uvumi kuhusu uwezekano wa urithi wa uongozi katika taifa hilo.