Mvutano kati ya Iran na Israel umeendelea kushika kasi baada ya pande hizo mbili kubadilishana mashambulizi ya anga siku ya Jumatano, huku uongozi wa kijeshi wa Iran ukikataa vikali madai ya Rais wa Marekani, Donald Trump, kwamba kuna mazungumzo yanayoendelea kumaliza vita hivyo.
Kwa mujibu wa taarifa kutoka kwa Jeshi la Iran, taifa hilo halipo katika mazungumzo yoyote na Marekani, likisisitiza kuwa Washington inazungumza yenyewe kuhusu mustakabali wa mzozo huo unaoendelea kuyumbisha masoko ya nishati na fedha duniani.
Iran: “Hatuwezi Kuelewana na Marekani”
Msemaji wa pamoja wa vikosi vya jeshi la Iran, Ebrahim Zolfaqari, alionekana akitoa kauli kali kupitia televisheni ya taifa, akipinga vikali dhana ya mazungumzo na Marekani.
Alisema Iran haina nia wala nafasi ya kufikia makubaliano na Marekani, akisisitiza kuwa historia ya uhusiano kati ya mataifa hayo imejaa “uzoefu mbaya wa kidiplomasia.”
Uongozi wa Iran umeendelea kusisitiza kuwa hauwezi kufanya mazungumzo na Washington kutokana na kile wanachodai kuwa mashambulizi yaliyofanywa na Marekani wakati wa mazungumzo ya awali katika miaka ya hivi karibuni.
Katika kipindi cha wiki nne tangu kuanza kwa mzozo huo, mashambulizi ya anga yameendelea bila kupungua.
Jeshi la Israel lilitangaza kuwa limefanya mashambulizi dhidi ya miundombinu mbalimbali ndani ya Tehran, likilenga pia maeneo yanayodaiwa kutengeneza makombora ya kivita ya baharini. Kwa mujibu wa taarifa za Israel, mashambulizi hayo yalilenga kupunguza uwezo wa kijeshi wa Iran.
Kwa upande wake, vyombo vya habari vya Iran viliripoti kuwa baadhi ya mashambulizi yalipiga maeneo ya makazi, huku vikosi vya uokoaji vikiendelea na juhudi za kuwatafuta watu waliokwama chini ya vifusi.
Nchi za Kuwait na Saudi Arabia pia ziliripoti kukabiliana na mashambulizi ya ndege zisizo na rubani (drones), ingawa hazikutaja moja kwa moja chanzo chake.
Kwa mujibu wa mamlaka za Kuwait, droni zililenga eneo la uwanja wa ndege wa kimataifa, ambapo zilisababisha moto katika moja ya matanki ya mafuta, bila kusababisha vifo.
Jeshi la Walinzi wa Mapinduzi la Iran (Revolutionary Guards) lilitangaza kuwa limeanzisha wimbi jipya la mashambulizi dhidi ya maeneo mbalimbali nchini Israel, yakiwemo Tel Aviv na Kiryat Shmona.
Taarifa za vyombo vya habari vya Iran pia zilisema mashambulizi yalilenga kambi za kijeshi za Marekani zilizopo katika maeneo ya Kuwait, Jordan na Bahrain.
